မြန်မာခရီးစဉ်မှာ မစ္စအာဘေးရဲ့ ဦးစားပေးအရာများ

ဆရာတော်ကိုဖူးမြော်ကာ စကားလက်ဆုံကျနေသော မစ္စအာဘေး/

ဓာတ်ပုံ -The Wall Street Journal

နိုဝင်ဘာ ၁၂ ရက်က ဖြစ်သည်။ သူမ၏ခင်ပွန်းသည် အရှေ့တောင်အာရှ နိုင်ငံ့ခေါင်းဆောင်များနှင့်အတူ ဒေသတွင်းအစည်းအဝေးတစ်ခု၌ ဆွေးနွေးစကားပြောနေသည်။ ထိုအချိန်တွင် ဂျပန်ဝန်ကြီးချုပ်ကတော် အာခီအာဘေးသည် သက်တော်ကြီးရင့်နေသည့် ဘုန်းတော်ကြီးတစ်ပါးရှေ့၌ ပုဆစ်တုပ်ထိုင်နေသည်။ အဆိုပါဘုန်းတော်ကြီးသည် သစ်ရိပ်ဝါးရိပ်ကောင်းမွန်သည့် ဘုန်းတော်ကြီးကျောင်းအနီးတွင် နွမ်းပါးချို့တဲ့သည့် ကလေးငယ် ၂၀၀ ကျော် ပညာသင်ကြားနိုင်ရန် စာသင်ကျောင်းလေးတစ်ခု တည်ထောင်ဖွင့်လှစ်ပေးထားသည်။

‘‘အရှင်ဘုရားက ဒီကလေးတွေကို ပညာသင်ကြားဖို့ နေရာလေးတစ်ခု ဖန်တီးပေးထားတဲ့အတွက် သူတို့လေးတွေ ကံကောင်းပါတယ်’’ဟု မစ္စအဘေးက ရိုရိုသေသေ လျှောက်ထားသည်။ ‘‘ဒီကျောင်းလေးဟာ အချိန်အကြာကြီး ဆက်ပြီးဖြစ်ထွန်းတည်မြဲနေဖို့ တပည့်တော်မျှော်လင့်ပါတယ်’’ဟုလည်း သူမကဆိုသည်။

သူမသည် မြန်မာ့ရိုးရာလုံချည်ကို ဆင်မြန်းထားသည့်တိုင် သက်သောင့်သက်သာပင်ရှိနေပြီး ကျောင်းသူကျောင်းသား ကလေးငယ်များ၊ ဆရာ၊ ဆရာမများအား မေးခွန်းများ စိတ်ဝင်တစားမေးမြန်းခဲ့သည်။

ဂျပန်ဝန်ကြီးချုပ်အဖြစ် မစ္စတာရှင်ဇိုအာဘေး ပထမအကြိမ် တာဝန်ယူခဲ့စဉ် ၂၀၀၆ ခုနှစ်က ပထမဆုံး နိုင်ငံခြားခရီးစဉ်တွင် မစ္စအာဘေးသည် ခင်ပွန်းသည်ကို လက်ချင်းချိတ်ကာ တောက်တောက်ပပ၊ စတိုင်ကျကျ အဝတ်အစားများဖြင့် လေယာဉ်ပေါ်မှဆင်းလာရင်း လူအများ၏အာရုံစိုက်မှုကို ခံယူခဲ့သည်။

နောက်ထပ်ရှစ်နှစ်ကြာပြီးနောက် ဂျပန်ဝန်ကြီးချုပ်အဖြစ် မစ္စတာအာဘေး ဒုတိယအကြိမ် တာဝန်ထမ်းဆောင်ပြီး ၂ နှစ်အကြာတွင်မူ မစ္စအာဘေးသည် တည်ငြိမ်ရင့်ကျက်ပြီး ယခင်နှင့်မတူတော့သည့် ဝန်ကြီးချုပ်ကတော်တစ်ဦးအဖြစ် ပြောင်းလဲလာသည်။ သူမသည် ခင်ပွန်းသည်၏ တရားဝင်ခရီးစဉ်များကို သူမ၏ ကိုယ်ပိုင်စိတ်ဝင်စားမှုအတွက် အသုံးချရန် ရှက်ရွံ့မနေတော့ချေ။ ခက်ခဲသည့် ဆွေးနွေးမေးမြန်းမှု တစ်စုံတစ်ရာကို အစပြုရန် တွန့်ဆုတ်နေခြင်းလည်း မရှိတော့။ ထို့အပြင် သူမခင်ပွန်း၏  နိုင်ငံရေးမူဝါဒများကို လူကြိုက်များအောင်လည်း ပိုမိုကူညီလာခဲ့သည်။

မြန်မာနိုင်ငံသည် သူမအတွက် သူစိမ်းဆန်ဆန်ဒေသမျိုးတော့ မဟုတ်ချေ။ သူမသည် အရှေ့တောင်အာရှဒေသရှိ နိုင်ငံသို့ အကြိမ်ပေါင်းအတော်များများ ရောက်ခဲ့ဖူးသည်။ သူမသည် ဒုက္ခများစွာကြုံခဲ့ပြီး ၂၀၀၇ ခုနှစ်တွင် အဆုံးသတ်ခဲ့သည့် ခင်ပွန်းသည်၏ ပထမအကြိမ် ဝန်ကြီးချုပ်ရာထူး သက်တမ်းအတွင်းက မြန်မာနိုင်ငံ၏ ဘုန်းတော်ကြီးသင် စာသင်ကျောင်းများအကြောင်း ကျမ်းတစ်စောင်ပြုစုပြီး မာစတာဘွဲ့ ရရှိခဲ့သည်။

ယခုတစ်ကြိမ် မြန်မာနိုင်ငံသို့ လာရောက်သည့် နှစ်ရက်ကြာခရီးစဉ်အတွင်း သူမသွားရောက်လိုသည့် နေရာများအတွက် ကိုယ်တိုင်ဆန္ဒပြု အစီအစဉ်ရေးဆွဲထားခဲ့ကြောင်း နိုင်ငံခြားရေးဝန်ကြီးဌာနကဆိုသည်။ မြန်မာနိုင်ငံ၏ မြို့တော်ဖြစ်သည့် နေပြည်တော်သို့ လေယာဉ်ပျံဆိုက်ရောက်လာပြီးသည်နှင့် မစ္စအာဘေးသည် အစိုးရအေဂျင်စီများထံ ကျွမ်းကျင်သူများ ပို့လွှတ်ပေးသည့် စိုက်ပျိုးရေးကောလိပ်သို့ သွားရောက်ခဲ့သည်။ မစ္စအာဘေးသည် အော်ဂဲနစ်စပါးစိုက်ခင်းများ ထူထောင်ထားပြီး မစ္စတာအာဘေး၏ ဇာတိဒေသမှ ထွက်ရှိသည့် လတ်ဆတ်သော ဟင်းသီးဟင်းရွက်များကို ဖြန့်ဖြူးရောင်းချပေးနေသည့် ဆိုင်တစ်ဆိုင်ကိုလည်း ဖွင့်လှစ်ထားသည်။ မစ္စအာဘေးသည် ခင်ပွန်းဖြစ်သူ၏ အစိုးရအဖွဲ့က ဒေသတွင်း လွတ်လပ်စွာ ကုန်သွယ်ခွင့်သဘောတူညီမှုအတွက် တွန်းအားပေးနေမှုအပေါ် သူမ၏ သံသယအချို့ကို ထုတ်ဖော်ပြောဆိုခဲ့ပြီး စိုက်ပျိုးရေးနှင့်ပတ်သက်သည့် အကြောင်းအရာများကိုလည်း ဆွေးနွေးခဲ့သည်။

သူမသည် မြန်မာနိုင်ငံ၏အမျိုးသမီး ပညာရေးဝန်ကြီးဖြစ်သူ ဒေါက်တာဒေါ်ခင်စန်းရီထံသို့လည်း သွားရောက်လည်ပတ်ပြီး ပညာရေးမူဝါဒများနှင့် လူ့အဖွဲ့အစည်းအတွင်း အမျိုးသမီးများ၏ အခန်းကဏ္ဍတို့အကြောင်း ဆွေးနွေးခဲ့သည်။

ဂျပန်နိုင်ငံခြားရေးဝန်ကြီးဌာန တာဝန်ရှိသူတစ်ဦးက ဂျပန်ဝန်ကြီးချုပ်ကတော်တစ်ဦး၏ ပြည်ပနိုင်ငံတစ်ခုမှ ဝန်ကြီးတစ်ဦးနှင့် တစ်ဦးချင်း တွေ့ဆုံဆွေးနွေးမှုမျိုးသည် သာမန်အခြေအနေတစ်ရပ်မဟုတ်ဟုလည်း ပြောကြားခဲ့သည်။

ခပ်သုတ်သုတ်နိုင်သော သူမ၏ခရီးစဉ်တွင် လူကုန်ကူးမှု၏ သားကောင်ဖြစ်ခဲ့သူများအား ကူညီစောင့်ရှောက်ပေးနေသည့် ဌာနတစ်ခုသို့ သွားရောက်ခဲ့ပြီး နိုင်ငံတကာနှင့် NGO အဖွဲ့အစည်းများတွင် အလုပ်လုပ်နေသည့် ဂျပန်အမျိုးသမီးများကို စိတ်ဓာတ်လှုံ့ဆော်ရေး အားပေးတွေ့ဆုံမှုများ ပါဝင်ခဲ့သည်။

ဘုန်းတော်ကြီးသင် စာသင်ကျောင်းလေးတွင်မူ မစ္စအာဘေးသည် မူလတန်းအတွက် အသုံးပြုသည့် ခပ်နိမ့်နိမ့်စားပွဲလေးတစ်လုံးအနီးတွင် ဒူးထောက်ထိုင်ရင်း ကျောင်းသူကျောင်းသား ကလေးငယ်များနှင့် ရင်းရင်းနှီးနှီး စကားပြောခဲ့သည်။ ထို့နောက်တွင်မူ သူမသည် ငှက်ပျောသီးပုံရေးဆွဲထားသည့် ကားချပ်တစ်ခုကို သတိပြုမိသွားသည်။ မစ္စအာဘေးသည် အဆိုပါပန်းချီကို ဖန်တီးသည့် အသက်(၁၄)နှစ်အရွယ် ကျောင်းသားလေးနှင့်လည်း စကားပြောခဲ့ရာ အဆိုပါကလေးငယ်က ၎င်း၏ဘဝဖြတ်သန်းမှုကို မျှဝေဖွင့်ဟခဲ့သည်။ အဆိုပါကျောင်းသားလေးသည် ငှက်ပျောစိုက်ခင်းတစ်ခုတွင် ကြီးပြင်းလာပြီး မိဘများက ၎င်းအတွက် ကျောင်းစရိတ်ထောက်ပံ့ပေးရန် မတတ်နိုင်ကြရှာကြောင်း သိရသည်။

ထို့နောက် အထက်တန်းကျောင်းသူကျောင်းသားများ ပညာသင်ကြားသည့် စားပွဲများသို့ သွားရောက်ခဲ့ပြန်ပြီး တက္ကသိုလ်ဝင်ခွင့်စာမေးပွဲနှင့် စာပေသင်ကြားမှု နည်းလမ်းများကို စိတ်ဝင်တစား မေးမြန်းခဲ့ပြန်သည်။

ဂျပန်နိုင်ငံသည် ဒေသတွင်းပြိုင်ဘက် တရုတ်၏ အရှိန်အဝါလွှမ်းမိုးမှုကို တွန်းလှန်ရပ်တည်ရန် အချိန်ပြည့်အားထုတ်နေရခြင်းကြောင့် မစ္စအာဘေးအနေဖြင့် မြန်မာနိုင်ငံခရီးစဉ်နှင့် ပတ်သက်၍ စိတ်အားတက်ကြွစွာ ရှိခဲ့သော်လည်း အတန်ငယ်ချုံ့ခဲ့ရသည်။ ‘‘ဂျပန်နိုင်ငံအကြောင်း ဘာတွေသိကြသလဲ’’ဟု သူမက အတန်ငယ်အသက်ကြီးသည့် ကျောင်းသားလေးအချို့ကို မေးမြန်းသည့်အခါ ၎င်းတို့က ရှက်စနိုးဖြင့် တခစ်ခစ်ရယ်ကြသည်။ ဆရာ၊ ဆရာမများက တိုက်တွန်းကြသည့်အခါ ကျောင်းသားလေးတစ်ယောက်က‘‘မော်တော်ကားတွေ’’ဟု ဖြေသည်။

သူမက ကျောင်းသားလေးများအား ‘‘ကောင်းပြီ။ တစ်နေ့နေ့မှာတော့ မင်းတို့လေးတွေ ဂျပန်ကိုလာပြီး ပညာသင်ကြားခွင့်ရမယ်လို့ မျှော်လင့်ပါတယ်။ ငါတို့တွေက မင်းတို့ကို နွေးနွေးထွေးထွေး ကြိုဆိုမှာပါ’’ဟု ပြောကြားသွားသည်။

http://www.7daydaily.com/story/25295#.VHBtNdKUeSr

(Wall Street Journal မှ ဆောင်းပါးရှင် ယူကာဟာရာရှီ၏ ဆောင်းပါးကို ဇွဲရဲဝင့် ဘာသာပြန်သည်။)